OEGA, parte do Fondo de Defensa Xurídica da Cordilleira Cantábrica

• Autor: OEGA
• 0 Comentarios

O responsable do OEGA, Xavier Simón, integrouse no equipo asesor do Fondo de Defensa Xurídica da Cordilleira Cantábrica (FDXCC) . O principal obxectivo deste fondo é dotarse dun soporte económico para promover accións legais en defensa da biodiversidade e da paisaxe da Cordilleira Cantábrica e a súa contorna fronte á avalancha de megaproxectos de enerxía eólica.
Para alcanzalo púxose en marcha unha campaña de crowdfunding, desenvolvida a través de migranodearena.org, plataforma de recollida solidaria de fondos, até o 5 de xuño de 2021, Día Mundial do Medio Ambiente.

Tres son os ámbitos nos que se define a acción do Fondo:

• Defensa xurídica. Preténdense impulsar accións legais no ámbito xudicial europeo, estatal e autonómico contra as accións das administracións públicas e contra a normativa sectorial que conculque a planificación e ordenación territorial previas. Tamén se tratará de actuar no caso de que esas accións contraveñan os tratados internacionais que regulan os dereitos de participación cidadá a respecto do medio ambiente.
• Asistencia a colectivos. O FDXCC axudará nas accións legais e de mobilización cidadá de diferentes colectivos, asociacións e comunidades locais que persigan os mesmos fins de defensa da biodiversidade e da paisaxe. Así mesmo, crearanse modelos de alegacións, recursos para seren usados nos procesos de autorización administrativa dos parques eólicos.
• Base de coñecemento en liña. Co fondo crearase unha base de coñecemento de acceso público mediante ferramentas de difusión documental.

 

Os impulsores desta iniciativa son a Asociación para a Defensa Ecolóxica de Galiza (ADEGA) , a Plataforma Bierzo Aire Limpio, a Mesa Eólica Merindades de Burgos, a Plataforma para la Defensa de la Cordillera Cantábrica, a Plataforma para la Defensa de los Valles Pasiegos e a Sociedade Galega de Ornitoloxía.

O Observatorio intégrase no equipo asesor co ánimo de contribuír a unha transición enerxética que integre os valores ambientais e non deixe atrás ás comunidades rurais

Segue este enlace se queres colaborar: migranodearena.