Moeche, un pequeno concello rural na busca do protagonismo local na transición enerxética

• Autor: OEGA
• 0 Comentarios

Moeche é un concello rural do norte da provincia da Coruña de 1.200 habitantes que se encadra na comarca de Ferrol. Como tantas outras pequenas vilas do rural galego, a actividade económica perdeu importancia e a poboación tende a ser cada vez menos. Atrás fican as minas de cobre, as caleiras e as explotacións gandeiras cheas de vida.

Desde o ano 2020, varias empresas enerxéticas tentan pór en marcha parques eólicos neste pequeno concello. Despois de varias propostas, a iniciativa da empresa Enel Green Power España, SL , filial de ENDESA, é a que se encontra máis avanzada desde o punto de vista do procedemento administrativo. Esta empresa tenta conseguir a autorización de 5 parques eólicos que se situan no norte da provincia da Coruña para entrelazalos cunha rede de transporte que lle permita seguir aproveitando a conexión á rede eléctrica que manexaba Endesa ata agora na xa cerrada Central Térmica de As Pontes. O parque eólico de Moeche forma parte dese macroparque dividido en 5 procedementos administrativos.

OEGA xa estivo en Moeche para asesorar á cidadanía en 2021 e volveu asistir para a mesma función na última semana de setembro. O acto, organziado pola asociación TEXMOECHE tivo lugar no Centro Cultural Francisco Piñeiro para tratar da situación actual do parque eólico. O parque foi autorizado inicialmente pero cunha serie de condicionados que obrigaron á empresa a solicitar unha modificación da autorización xa concedida. Basicamente, reduciuse o número de aeroxeradores de 12 a 5, mantendo a potencia total e incrementando a potencia unitaria de cada aeroxerador desde 4,5 a 7,2 MW.

Durante máis de dúas horas, o responsable do OEGA e a cidadanía asistente sumíronse nun diálogo construtivo que axudou, segundo os presentes, a clarexar aspectos clave sobre o desenvolvemento deste parque eólico. Entre eles, podemos mencionar os seguintes:

• A empresa está a ocultar información: non entregou ningún modelo de contrato e o seu intermediario en Moeche afirma que os veciños e veciñas se non aceptan as súas condicións poden ser expropiados. É falso pois ata o día de hoxe a empresa no solicitou a declaración de utilidade pública.
• As condicións que ofrece a empresa encóntranse entre as máis baixas das que se ofertan actualmente en Galicia. A empresa podería ofrecer un maior pagamento, incluso unha participación na facturación, e iso non impediría o éxito da empresa con este investimento.
• A empresa vai realizar un negocio moi, moi lucrativo. Obterá beneficios caídos do ceo: se o prezo de venda da electricidade fora o de 2022, podería amortizar o investimento en menos de 3 anos. Se fose o prezo de setembro de 2023, a amortización requiriría pouco máis de 5 anos.
• A empresa non ten intención de pagar nada pola superficie que cambiaría de cualificación urbanística (máis de 90 hectáreas). Pero a propiedade perde valor. É inxusto.
• A empresa non ten intención de pagar nada pola superficie que se encadra dentro das zonas de exclusión de competidores (case 4.600 hectáreas). Centos de propietarios perden dereito ao futuro pero a empresa non pagaría nada por iso.
• Desde 2021 ata 2023, a mobilización social con perto de 900 alegacións presentadas conseguiu que a empresa reducira o número de aeroxeradores e polo tanto o impacto paisaxístico, de ruído e de ocupación.
• No debate apareceron varias preocupacións ambientais relacionadas coa calidade e acceso á auga e coa distancia dos aeroxeradores a lugares habitados.

A principal recomendación do OEGA aos cidadáns de Moeche reunidos no Centro Cultural foi que se manteñas unidos, que sigan defendendo conxuntamente os seus interese, que negocien conxuntamente coa empresa e que se aproveiten do apoio do Concello para que este asuma os custes técnicos e xurídicos da defensa da súa postura.

A alcaldesa de Moeche, presente entre o público, afirmou que o concello presentou recurso de alzada á autorización previa do parque eólico e que non descartaban a opción de presentar un recurso contencioso administrativo se con iso se defendesen os intereses xerais de toda a cidadanía de Moeche. Noutra orde de cousas, a alcaldesa animou a todos os presentes a sumarse á comunidade enerxética que están a desenvolver desde o Concello.