Movemento ambientalista contra parques eólicos

• Autor: OEGA
• 0 Comentarios

A raíz da noticia de que capital público noruegués pretende levar adiante tres novos megaparques eólicos nas montañas ourensás e leonesas e da reactivación dos parques eólicos na Serra da Groba e no Galiñeiro, numerosos colectivos ambientalistas e movementos sociais sumáronse ás iniciativas da Comarca de Ordes para tratar de frear esta nova onda expansiva da enerxía eólica.

Os principais argumentos destes movementos son de carácter ambiental

• Sinálanse afeccións severas a espazos de Rede Natura como: Zona de Especial Conservación Macizo Central e no ZEC e ZEPA Pena Trevinca, ZEC Río Támega, ZEC Bidueiral de Montederramo, ZEC Ancares -Courel e ZEC Ribeiras do río Sil e afluentes.
• Apúntase a vulneración da Directiva 92/43/CEE, relativa á Conservación de Hábitats Naturais e da Fauna e Flora Silvestres.
• Sinálase a prevalencia da protección ambiental, derivada da Lei 42/2007, do 13 de decembro, do Patrimonio Natural e da Biodiversidade, sobre a ordenación territorial e urbanística e a necesaria precaución nas intervencións que poidan afectar a espazos naturais ou especies silvestres.
• Os valores ambientais que foron considerados para anular intentos anteriores para desenvolver eólicos en Pena Trevinca, son novamente presentados como valores ambientais que deben prevalecer fronte aos proxectos industriais.
• A protección dos cauces das augas, tantos superficiais como soterradas, tamén son sinalados como valores ambientais ameazados.
• Tamén son significativas as apelacións á fragmentación artificiosa de infraestruturas correspondentes ao mesmo proxecto industrial, mostrando como parques eólicos que comparten infraestruturas imprescindibles para seu funcionamento son divididos en varios parques impedindo e obstaculizando a avaliación global, sumativa e sinérxica dos impactos ambientais do conxunto das infraestruturas do proxecto industrial.

Argumentos sociais contra megaproxectos de parques eólicos

• Tamén usan argumentos de carácter social. Mencionan en varios documentos que os recursos para as comunidade locais, cando se instala un parque eólico, non son suficientes para compensar os problemas estruturais desas comunidades. Afirman que os parques eólicos non son unha solución para ao rural. “isto non é unha solución para o rural.
• Estes movementos móstranse a favor da transición enerxética pero defenden o que denominan unha verdadeira transición enerxética sostible e harmónica: tendo en conta as singularidades de cada territorio, apostando polo autoconsumo e o desenvolvemento da enerxía solar térmica e fotovoltaica, promovendo o consumo responsable de enerxía, apostando por reducir a mobilidade individual e promovendo a mobilidade colectiva, etc.

 

Movemento global

Numerosos destes movementos iniciaron campañas a través das redes, para recompilar apoios, principalmente a través da plataforma change.org. Entre elas: Apoio a Manifesto Aldeas Con Horizonte, apoio a movemento contra o parque eólico Felga, Petición polo Courel libre de eólicos, petición da organización SOS Groba;
Tamén compre mencionar un conxunto de manifestos de diversas organizacións: Manifesto Aldeas con Horizonte, Manifesto ALIENTE pola biodiversidade, Manifesto Salvemos Trevinca e Manifesto IEM PE Groba.

Propostas do Observatorio

OEGA sempre mantivo que a transición enerxético, e a ecolóxica na que aquela debe inserirse, require contemplar obxectivos diversos, non só o incremento da potencia renovable instalada, e actores diferentes, non só os mesmos actores que conduciron aos problemas ambientais que se queren resolver coa transición enerxética. Neste sentido, desde o Observatorio defendemos as seguintes medidas:

• Reservar zonas ambientais fóra do desenvolvemento industrial das enerxías renovables
• Actualizar a lexislación autonómica para adaptala ao cambio tecnolóxico
• Dar cabida a novas formas de propiedade na promoción de parques eólicos (e outras enerxías)
• Apostar por decisións pausadas que minimicen o noso arrepentimento futuro, abrir a unha maior e máis pausada participación cidadá as decisións de planificación territorial e enerxética
• Considerar a necesidade de eliminar consumo enerxético superfluo e apostar rigorosamente pola eficiencia.

 

Estas medidas, e moitas outras, son necesarias para que o novo modelos enerxético, económico e ecolóxico, sexa inclusivo e sustentable, e dea resposta ás necesidades sociais da nosa e de todas as xeracións que virán tras esta na que estamos a vivir.